தோழர்களே நினைவிருக்கிறதா
நம் சுயமரியாதையின் வீட்டிற்கு
விடுதலை என்று பெயரிட்டார் பெரியார்
தந்தை பெரியாரும் அன்னை மணியம்மையாரும்
அண்ணாவும் இந்த வீட்டில்தான் வசித்தனர்
வஞ்சகங்களையும் துரோகங்களையும்
தமிழர் மீது பொழிந்த மந்திரங்களையும்
துரத்தியடித்தது இந்த வீடுதான்
செங்கொடி ஏற்றியவர்களும்
கதர் சட்டை அணிந்தவர்களும்
பயிற்சி எடுத்தது இந்த வீட்டில்தான்
விடுதலை என்பது போர்க்களமல்ல
நம் பள்ளிக்கூடம்
அங்கேதான் நம் ஆசிரியர் இருக்கிறார்
மனித நாகரீகங்கள்
ஆற்றங்கரையினில் இருந்து தொடங்கின எனில்
தமிழரின் சுயமரியாதை பண்பாட்டு
நாகரீகம்
விடுதலையின் கரையில் தொடங்கியது
விடுதலையில் நடமாடுபவர்கள்
வானத்திலிருந்து வந்தவர்களல்ல
சாமானியர்கள் ஒடுக்கப்பட்டவர்கள்
பிற்படுத்தப்பட்டவர்கள்
தாழ்த்தப்பட்டவர்கள்
விடுதலை என்பது
தமிழர்களின் மண்டையோட்டிற்குள் நுழைந்த
பழைய வேதாந்தங்களை
அறுவை சிகிச்சையில்
குணப்படுத்தும் மருத்துவமனை
பேதங்களின் யுத்தங்களிலிருந்து
தமிழர்களை மீட்டெடுக்கும்
பகுத்தறிவின் படையெடுப்பு
விடுதலை என்பது அச்சடித்த காகிதமல்ல
87 ஆண்டுகளை உள் வாங்கி
வளர்ந்து நிற்கும் அசுரர்களின் பெருவெளி
தேசியத்தின் வெட்பம் தாங்காமல் வருகிறவர்களுக்கு
நிழல் தரும் திராவிடர் கோட்டம்
விடுதலை என்பது
பெண்ணுரிமைகளின் நாக்கு
சமூகத்தின் வலிகளையும்
காயங்கலையும் சொல்லி
வாதாடும் சமூக நீதி வழக்குரைஞர்
பகுத்தறிவின் கீழடி
விடுதலை என்பது
விரிந்த தமிழ் பரப்பின் மீது
படரும் நச்சு கதிர் வீச்சுகளை
தடுத்து நிற்கும் ஓசோன் படலம்
விடுதலை என்பது நம் மானம் காக்க
ஆசிரியர் நெய்து தரும்
சுயமரியாதை ஆடை
விடுதலை என்பது
சடங்குகளுக்கு விற்கப்பட்டு
கொத்தடிமைகளாக கிடப்பவர்களை
விடுவிக்கும் அதிகாரம்
விடுதலை என்பது
இரண்டாயிரம் ஆண்டுகளாய் அப்பிக்கிடக்கும்
அநீதிகளின் மீது தீப்பிழம்பை கக்கும்
எரிமலையின் வாய்
விடுதலை என்பது
தமிழர் மானத்தை மீட்டுத்தரும்
தனிமனித ராணுவம்
விடுதலை என்பது
தமிழர்கள் தொலைந்த போதெல்லாம்
கண்டு பிடித்து தரும்
சுய மரியாதை காவல் நிலையம்
அது தமிழர்களின் கருவறை
கடவுள்களை காலாவதியாக்கும்
அறிவின் சோதனைக்கூடம்
விடுதலை என்பது
பூஜை அறையில் அடிக்கும் மணியல்ல
நரகத்திற்கும்
சொர்க்கத்திற்கும் நடுவே நடமாடுபவர்களை
அறிவின் கூடத்திற்கு அழைக்கும் அழைப்பு மணி
புரட்டுகளை தோலுரித்துக்காட்டும்
ஒப்பனை தேவையில்லாத
அறிவின் ரௌத்திரம்
சமூகநீதியெனும் விதை நெல்லின் களஞ்சியம்
மனுவின் அதர்மங்களை
அலசி ஆராயும் ஆய்வகம்
விடுதலை என்பது
எத்தனை சம்மட்டிகளாலும்
உடைத்தெடுக்க முடியாத
திராவிடத்தின் கிழக்கு
விடுதலை என்பது
சம்பூகனின் மரணத்திற்காக
நியாயம் கேட்கும் போராளி
விடுதலை என்பது
தமிழக அரசின் மீது படரும்
ராகு கேதுகளை
விழுங்கும் சூரியகிரகணம்
விடுதலை என்பது
இடுப்பில் கிடந்த துண்டை
தோளில் போட்ட தோழமை
விடுதலை என்பது
எதிரிகளின் தூக்கத்திலும்
அதிர்ந்து ஒலிக்கும் திராவிடப்பறை
விடுதலை எங்களுக்காக இருக்கிறது
விடுதலைக்காக நாங்கள் இருக்கிறோம்
விடுதலை எங்களு க்காக எழுதும்
விடுதலைக்காக நாங்கள் எழுதுவோம்
யுத்தக்காலத்தில்
அது வாள் கேடயம்
மழைக்காலத்தில் அது கருப்பு குடை
விடுதலை பாதை போடுகிறது
அந்தப்பாதையில் நடந்து செல்கிறோம்
நாங்கள் உறங்கிக்கொண்டிருக்கிறோம்
விடுதலை எங்களுக்காக விழித்துக்கொண்டிருக்கிறது
வாழ்க விடுதலை வளர்க விடுதலை
கோசின்ரா
No comments:
Post a Comment