கவி வித்தகர் புலவர்
தில்லைக் கல்விக்கரசன்
பள்ளி செல்லும் இளம்பருவம் - அன்றே
பயின்றார் பெரியாரின் பகுத்தறிவை
உள்ளமும் திராவிடர் கழகத்தில் - நன்றே
ஒன்றாகி இணைந்து நின்றது
பெரியாரின் சிறப்புரைக் கூட்டங்கள் - அதில்
பேசி இளமையில் பெயர்பெற்றார்!
அரிதான பெரிய போராட்டம் - பல
அதிலும் போராடிச் சிறைசென்றார்
மூட நம்பிக்கை நிறைந்து - மக்கள்
முழுஅறி யாமையில் இருந்தநாளில்
சீடராய் வந்தார் பெரியார்க்கு - நல்ல
சிந்தனையைத் தூண்டினார் நாட்டினர்க்கு!
தெய்வங்கள் பலசொல்லித் திரியாதீர் - அதற்குத்
திருவிழாஎன்றெதுவும் செய்யாதீர்!
செய்யுங்கள் முடிந்ததை ஏழையர்க்கு - நாடு
சிறந்து உயர்ந்திட உழையுங்கள்!
என்றே எடுத்துச் சொன்னார் - பல
ஏட்டிலும் எண்ணத்தை வடித்தார்!
சென்ற பாதையை மாற்றியே - நல்ல
சிறந்த வழியைக் காட்டினார்!
சின்ன வயதில் இருந்தது - போன்றே
சிறப்புடன் பொதுப்பணி செய்கிறார்!
இன்னும் வாழ்க நூறாண்டு - என
எம்அய்யா வீரமணியை வாழ்த்துவமே!
***
No comments:
Post a Comment