முடிவிற்கு வரும் 10 ஆயிரம் ஆண்டுகாலப் போராட்டம்! மலேரியாவிற்கு எதிரான தடுப்பூசி கண்டுபிடிப்பு!

மனித இனம் தோன்றியதில் இருந்து நோய்க் கிருமிகளால் உயிரிழந்து கொண்டுதான் உள்ளது. இதில் பல நோய்களுக்கான தடுப்பு மருந்துகள் கண்டறியப்பட்டு விட்டது, 

ஆனால், மலேரியா என்னும் கிருமியால் வரும் நோய்க்கு தடுப் பூசியை உருவாக்குவதில் இதுவரை பெரும் சவால்கள் தொடர்ந்தன. 

சுமார் 10 ஆயிரம் ஆண்டு களுக்கு முன்பு வாழ்ந்த ஹோமோ செபியன்ஸ் உடல் ஆல்ப்ஸ் மலையின் பனிக்கட்டிகளுக்கு கீழ் கண்டெடுக்கப்பட்டது. அந்த உடலை ஆய்வாளர்கள் ஆய்வு செய்த போது மலேரிய நோய்க்கிருமியால் பாதிக்கப்பட்டு இறந்துள்ளார் என்று தெரியவந்தது. இதை வைத்துத்தான் மலேரியா மிகவும் பழைமையான நோய்தொற்று என்று முடிவிற்கு வந்தனர். இந்த மலேரியா போன்ற ஒட்டுண்ணி நோய்க்கு எதிராக தடுப்பூசியை உருவாக்குவதில் அறிவியல் மற்றும் தயாரிப்பு பணிக்காக  30 ஆண்டுகளுக்கும் மேலாக சுமார் 700 மில்லியன் டாலர் செலவாகியுள்ளது.

மலேரியா ஒவ்வொரு ஆண்டும் கிட்டத்தட்ட 6 லட்சம் மக்களைக் கொல்கிறது. அவர்களில் பெரும்பாலானோர் ஆப்பிரிக்காவில் அய்ந்து வயதுக்குட்பட்ட குழந்தைகள் என்பது துயரமானது. இந்த நோய்க்கு எதிராக பயனுள்ள தடுப்பூசியை உருவாக்க வேண்டிய அவசியம் நீண்ட காலமாக முதன்மையாதாக இருந்து வருகிறது. ஆனால், மலேரியா ஒட்டுண்ணியின் மிகவும் சிக்கலான வாழ்க்கைச் சுழற்சியைக் கருத்தில் கொண்டு, பாதுகாப்பு நோய் எதிர்ப்பு சக்தியுடன் தொடர்புபடுத்தும் முக்கிய கூறுகளின் தன்மை மிகவும் கடினமாக உள்ளது. 

நம்பிக்கையான முன்னேற்றம்

பல நூற்றாண்டு காலமாக மெதுவான முன்னேற்றத்திற்குப் பிறகு, நீண்ட போராட்டத்தின் முடிவில் தடுப்பூசி கண்டறியப்பட்டுள்ளது. குழந்தை களுக்கு தடுப்பூசி போடுவதற்காக கிளாக்சோ ஸ்மித் க்லைன் (ஜி.எஸ்.கே) உருவாக்கிய ஆர்.டி.எஸ், எஸ்.ஏ.எஸ்01 மஸ்குரிக்ஸ் (RTS,S/AS01 (Mosquirix)  தடுப்பூசிக்கு அக்டோபர் 2021 இல் உலக சுகாதார அமைப்பு ஒப்புதல் அளித்தது ஒரு முக்கிய மைல்கல். RTS,S/AS01 மிதமான செயல்திறனைக் கொண்டிருந்தாலும், 5 வயதுக்குட்பட்ட குழந்தை களுக்கு நான்கு டோஸ்களுக்குப் பிறகு கடுமையான மலேரியா நோயாளிகளுக்கு 30 சதவிகிதம் ஆபத்தை மட்டுமே குறைக்கிறது. இது இன்னும் குறிப்பிடத்தக்க பொது சுகாதார நலன்களை அளிக்கிறது. இதனால், ஒவ்வொரு ஆண்டும் ஆயிரக்கணக்கானவர்களின் உயிர்களைக் காப்பாற்ற முடியும்.

ஜி.எஸ்.கே. மஸ்குரிக்ஸ்-அய் தயாரிக்க பாரத் பயோடெக் அனுமதி வழங்கியுள்ளது. மேலும், 2029ஆம் ஆண்டில் அய்தராபாத்தை தளமாகக் கொண்ட நிறுவனம் இந்த தடுப்பூசியின் ஒரே உலகளாவிய உற்பத்தியாளராக இருக்கும் என்று எதிர்பார்க்கப்படுகிறது.

இருப்பினும், RTS,S/AS01  தடுப்பூசியானது, 2015இல் நிர்ணயிக்கப்பட்ட 75 சதவீத மலேரியா தடுப்பூசி செயல்திறனுக்கான உலக சுகாதார அமைப்பின் அளவுகோலைச் சந்திக்கத் தவறிவிட்டது. செப்டம்பர் 2021இல், மற்றொரு மலேரியா தடுப்பூசி, R21/Matrix M, இங்கிலாந்தில் உள்ள ஆக்ஸ்போர்டு பல்கலைக்கழகத்தால் உருவாக்கப்பட்டது. புர்கினா பாசோவில் உள்ள 450 குழந்தைகளிடையே 1 மற்றும் 2ஆம் கட்ட சோதனைகளில் 77 சதவிகித செயல்திறன் நிரூபிக்கப்பட்டது. செப்டம்பர் 2022 தொடக்கத்தில், லான்செட் தொற்று நோய்கள் இதழில் R21/Matrix-Mஇன் பூஸ்டர் டோஸின் முடிவுகளை வெளியிட்ட பிறகு, இந்தத் தடுப்பூசி மீண்டும் தலைப்புச் செய்தி ஆனது.

தடுப்பூசிகள் செயல்படும் முறை

RTS,S மற்றும் R21 ஆகிய தடுப்பூசிகள் ஒரே மாதிரியானவை. இவை இரண்டும் கல்லீரல் நிலை ஒட்டுண்ணியின் மேற்பரப்பில் காணப்படும் ஸ்போரோசோயிட் எனப்படும் முக்கிய புரதத்தின் அதே பகுதியைக் கொண்டிருக்கின்றன. இரண்டிலும் ஹெபடைடிஸ் பி வைரஸ் மேற்பரப்பில் ஆன்டிஜென் (HBsAg) உள்ளது. இது சுயமாக உருவாகும் திறன் கொண்ட ஒரு புரதம். ஒட்டுண்ணியுடன் இணைந்து CSPஆன்டிஜெனின் வைரஸ் போன்ற துகள்களை உருவாக்க உதவுகிறது.

இரண்டு தடுப்பூசிகளுக்கும் இடையிலான முக்கியமான வேறுபாடு ஹெபடைட்டிஸ் பி வைரஸ் மற்றும் ஆண்டிஜென் அளவுதான். RTS,S-இல் கூட்டு புரதம் சுமார் 20 சதவீதம் உள்ளது. மீதமுள்ள 80 சதவீதம் HBsAg ஆன்டிஜெனால் ஆனது. இது தனித்தனியாக உற்பத்தி செய்யப்படுகிறது. மறுபுறம், R21, முற்றிலும் CSP இணைவு புரதத் தொகுதிகளால் ஆனது. இதன் விளைவாக CSP ஆன்டிஜெனின் அதிக அளவு வைரஸ் போன்ற துகள் மேற்பரப்பில் காட்டப்படுகிறது. இது ஹோஸ்டின் நோயெதிர்ப்பு அமைப்புக்கு அதன் வெளிப்பாட்டை கணிசமாக அதிகரிக்கிறது.

நோயெதிர்ப்பு நடவடிக்கையை அதிகரிக்க, அனைத்து புரத அடிப்படையிலான மறுசீரமைப்பு தடுப்பூசிகளும் வலுவான துணை மருந்தை பெரிதும் நம்பியுள்ளன. RTS,S  ஆனது GSKஇல் உருவாக்கப்பட்ட AS01எனப்படும் துணை கொண்டு உருவாக்கப்படுகிறது; நோவாவாக்ஸ் (சுவீடன்) உருவாக்கிய மேட்ரிக்ஸ்-எம் எனப்படும் துணைப் பொருளை R21பயன்படுத்துகிறது. மேட்ரிக்ஸ் எம் சபோனின் - தாவர அடிப்படையிலான பொருளைக் கொண்டுள்ளது. இந்த தடுப்பூசிகளுக்கு ஆன்டிபாடி மற்றும் செல்லுலார் நோயெதிர்ப்பு நடவடிக்கைகளைத் தூண்டுகிறது. இரண்டு தடுப் பூசிகளும் அதிக அளவிலான செயல்திறன் மற்றும் பாதுகாப்பைக் காட்டியுள்ளன. மேட்ரிக்ஸ்-எம் இன்ஃப்ளூயன்ஸாவிற்கு எதிரான பல்வேறு தடுப்பூசி சூத்திரங்களில் பயன்படுத்தப்பட்டது. மேலும், சமீபத்தில் நோவாவாக்ஸ் கோவிட்-19 தடுப்பூசியில் பயன்படுத்தப்பட்டது.

3ஆம் கட்ட முடிவுகளுக்காக காத்திருப்பு

R21இன் பூஸ்டர் டோஸின் சமீபத்திய முடிவுகள் தகுதியான உற்சாகத்தை உருவாக்கியிருந்தாலும், தடுப்பூசியின் பெரிய கட்டமான 3ஆம் கட்ட சோதனையின் முடிவுகள் ஆவலுடன் எதிர்பார்க்கப் படுகிறது. R21இன் 3ஆம் கட்ட சோதனைகள் ஏற்கெனவே நான்கு ஆப்பிரிக்க நாடுகளில் 5-36 மாத வயதுடைய குழந்தைகளிடம் நடந்து வருகின்றன. இதில் இரண்டு நாடுகளில் மலேரியா ஆண்டு முழுவதும் அச்சுறுத்தலாக உள்ளது. இந்த சோதனைகளில், புர்கினா பாசோ, கென்யா, மாலி மற்றும் தான்சானியாவில் உள்ள அய்ந்து இடங்களில் 4,800 குழந்தைகளிடம் R21-இன் செயல்திறன் மற்றும் பாதுகாப்பு திறன் சோதிக்கப்படும். முதல் கட்ட முடிவுகள் 2023 இறுதிக்குள் எதிர்பார்க்கப்படுகிறது.

ஆபத்து பயன் மதிப்பீட்டை உருவாக்க பெரிய அளவிலான, நன்கு சேகரிக்கப்பட்ட பாதுகாப்பு தரவு தேவைப்படும். SARS-CoV-2  தொற்றுநோய் அனுபவம், லட்சக்கணக்கான நோய்த்தடுப்பு மருந்துகள் பதிவு செய்யப்படும் வரை குறிப்பிடத்தக்க பாதகமான நிகழ்வுகள் கண்டறியப்படாமல் போகலாம் என்பதை நினைவூட்டுகிறது.

தடுப்பூசி உருவாக்கத்தில் முன்னோக்கி செல்லும் பாதை நீண்டது. ஆனால், R21 தடுப்பூசி தனியாகவோ அல்லது குருதியின் நிலை அல்லது பரிமாற்ற நிலை தடுப்பூசி உருவாக்குபவர்களுடன் இணைந்து, மலேரியா ஒழிப்புக்கான இறுதி இலக்கை அடைய தொடர்ந்து முயற்சி செய்யப்படும். மலிவு விலையில் திறமையான மலேரியா தடுப்பூசிகளை உருவாக்குவதில் அல்லது தயாரிப்பதில் இந்திய நிறுவனங்கள் முக்கிய பங்கு வகிக்கும் என்பது தெளிவாகிறது.

மலேரியா அல்லது காய்ச்சல் போன்ற நோய்களுக்கு இந்தியாவில் பாதுகாப்பான மற்றும் அறிவியல் பூர்வமாக வலுவான கட்டுப்பாட்டு மனித தொற்று மாதிரிகளை நிறுவுவதில் ஒரு பெரிய இடைவெளி உள்ளது. முதல் கட்டம் பாதுகாப்பு ஆய்வுகளை முடித்த பிறகு, வளர்ச்சியில் உள்ள அனைத்து மலேரியா தடுப்பூசிகளும் பாதுகாப்பான மற்றும் அறிவியல் பூர்வமாக கட்டுப்படுத்தப்பட்ட மனித மலேரியா தொற்று (CHMI) மாதிரியில் சோதிக்கப்பட வேண்டும். இது அய்ரோப்பா, இங்கிலாந்து, கொலம்பியா மற்றும் தாய்லாந்தின் பல நாடுகளில் நிறுவப்பட்டுள்ளது. RTS, S மற்றும் R21ஆகிய இரண்டும் CHMI-இல் மேலும் பாதுகாப்பு மற்றும் செயல்திறன் தொடர்பான சோதனைகளுக்கு முன் சோதிக்கப்பட்டது.

மரபணு பொறியியல் மற்றும் பயோ டெக்னாலஜிக் கான பன்னாட்டு மய்யத்தின் (ICGEB) டில்லி விஞ்ஞானிகள், நாட்டில் உருவாக்கப்பட்ட மற்றும் தயாரிக்கப்பட்ட இரண்டு சோதனை இரத்த நிலை மலேரியா தடுப்பூசிகளின் முதல் கட்ட பாதுகாப்பு சோதனைகளை மேற்கொண்டனர். ஆனால், இந்தி யாவில் CHMI மாதிரி இல்லாத நிலையில் இந்த தடுப்பூசிகளை மேலும் மேம்படுத்துவது சவாலாக உள்ளது. தொற்று நோய்களுக்கு எதிரான புதிய தடுப்பூசிகளை உருவாக்குவதில் விஞ்ஞானிகளுக்கு உதவ, அறிவியல், நீண்ட கால தொடர்ச்சியான நிதி, ஒழுங்குமுறை மற்றும் தளவாட செயல்முறைகள் சிறப்பாக ஒருங்கிணைக்கப்பட வேண்டும். மிகவும் வெற்றிகரமான மற்றும் ஆழ்ந்த ஈடுபாடு கொண்ட தடுப்பூசி உற்பத்தி செய்யும் பயோபார்மா தொழில் மற்றும் வலுவான அறிவியல் அடிப்படையுடன், இந்தியா தடுப்பூசிகளை உருவாக்கி தயாரிப்பதில் உலகை வழிநடத்த முடியும்.

(குறிப்பு: இந்தக் கட்டுரையை எழுதியவர்: மருத்துவர் சவுகான், ICGEB-யில் எமரிட்டஸ் மூத்த விஞ்ஞானி, இவர் மலேரியாவுக்கான மறுசீரமைப்பு தடுப்பூசியை உருவாக்குவதில் குறிப்பிடத்தக்க பங்களிப்பைச் செய்துள்ளார்.)