செய்தியும், சிந்தனையும்....!

கசப்பான இனிப்பு!


அமெரிக்கப் பாடகி மேரி மில்பென் வெளியிட்ட தீபாவளி வழிபாட்டு பாடல் ''ஓம் ஜெய் ஜகதீஷ் ஹரே'' பாடல் அனைத்துத் தரப்பினரையும் ஈர்த்துள்ளது.


'ஓம்' உள்ளிட்ட சொல்லுக்கு அர்த்தம் தெரிந்திருந்தால் அமெரிக்கப் பாடகி அதிர்ச்சி அடைந்திருப்பார்; ஆமாம், இப்பொழுது மட்டும் இந்துப் பண்டிகைப் பாடலை கிறித்தவரான ஓர் அமெரிக்கப் பாடகி பாடினால் இனிக்கிறதோ!


ஆசியா? ஆதங்கமா?


பீகாரில் தேஜஸ்விக்கு அனுபவம் போதவில்லை  - இன்னும் காலம் இருக்கிறது: - உமாபாரதி.


ஆசியா- ஆதங்கமா? உங்களுக்குத்தான் அனுபவம் நிரம்பவே இருக்கிறதே - ம.பி. முதலமைச்சர் நாற்காலியைத் தங்களிடமிருந்து பறித்தது ஏனோ?


பா.ஜ.க. என்றால் பா.ஜ.க.தான்!


மீண்டும் வேல் யாத்திரை தொடங்கப்படும்; மத்திய அமைச்சர் சதானந்தா கவுடா, மத்திய வெளியுறவுத் துறை இணை அமைச்சர் முரளிதரன் முதலியோர் பங்கேற்பர்: - எல்.முருகன், தமிழக பா.ஜ.க. தலைவர்.


எந்த வகையிலாவது ரகளை செய்யவேண்டும், விளம்பரம் பெறவேண்டும் - பா.ஜ.க.வின் பண்பாடோ? பண்பாடு!


அண்ணாமலைக்கு அரோகரா!


திருவண்ணாமலை தீபத் திருவிழாவை பெயரளவில் நடத்தத் திட்டமிட்டதால் திருவண்ணாமலை மாவட்ட ஆட்சியர் இடமாற்றம்.


கரோனா காலத்தில் பெரிய கூட்டத்தைக் கூட்டி கோவிட் -19 நோயாளிகளின் எண்ணிக்கை பெருகியிருந்தால் அருணாசல ஈசுவரனா காப்பாற்றப் போகிறான்?


கிழிகிறது பார் முகமூடி!


கேந்திரிய வித்யாலயாவில் ஒரு வகுப்பில் 20 மாணவர்கள் விரும்பினால்தான் 6 ஆம்வகுப்பிலிருந்து தமிழ் கற்பிக்கப்படும்: - மத்திய பா.ஜ.க. ஆட்சி அறிவிப்பு.


அதேபோல, மூன்றாவது மொழிக்கும் நிபந்தனை விதிக்கப்படுமா? பா.ஜ.க. என்னும் பார்ப்பன ஜனதா ஆட்சியின் முகமூடி கிழிகிறது.


கடவுள்களுக்குள்


மல்யுத்தம்!


தீபாவளி - பட்டாசு வெடிப்பால் தீக்காயங்களுக்கு ஆளாகி வருவோர்க்கு சென்னை கீழ்ப்பாக்கம் அரசு மருத்துவக் கல்லூரி மருத்துவனையில் சிறப்பு வார்டுகள் தயார்.


மகாவிஷ்ணுவுக்கும் - அக்னி பகவானுக்கும் மல்யுத்தமோ?


தீபாவளியா - தீய மூளியா?


‘பேண்ட்' நோ -


வேட்டி ‘யெஸ்!'


திருப்பதியில் மூலவரைத் தரிசக்க பேண்ட் அணிந்து வந்தவர்களுக்கு அனுமதியில்லை.


ஓ, வேட்டி வியாபாரமோ என்று தமாஷாகப் பதிவு போடலாம் என்று நினைத்தால், தமாஷ் அல்ல - வேட்டி வியாபாரம் தானாம் - பேண்ட் அணிந்து செல்பவர்கள் தடுக்கப்படும்போது - இன்னொருவர் அங்கு வந்து, 'அதோ அந்தக் கடையில் வேட்டி கிடைக்கும்' என்பாராம். நாம் சொல்லவில்லை, 'குமுதம் ரிப்போர்ட்டர்' சொல்லுகிறது.


பக்தி - நல்ல பிசினஸ்தானே!


‘குடி'யைக் கெடுக்கும்


நாள் ஒன்றுக்கு இந்தியாவில் மதுவால் 10 பேர் உயிரிழக்கிறார்கள்.


'குடி' குடியைக் கெடுக்கும் என்று சும்மாவா சொன்னார்கள்!


திருமாவின்


குமுறல்!


37 சதவிகிதம் வழக்குகள் 20 சதவிகித தாக்குதல்கள் பட்டியல் ஜாதி பெண்களுக்கு எதிராக அதிகரித்துள்ளன: - கிரைம் இந்தியா தகவல்.


விடுதலைச் சிறுத்தைகள் கட்சியின் தலைவர் தோழர் திருமாவளவன் குமுறுகிறார் என்றால், இதுதான் காரணம் - மனு விதைத்த விஷ விதை விருட்சமாக வளர்ந்துவிட்டதே!


Comments